Sep15

Íslensku bókmenntaverðlunin

Höfundur Bryndís Loftsdóttir

Hægt er að leggja fram bækur til Íslensku bókmenntaverðlaunanna 2015 til 14. okt. nk.

Íslensku bókmenntaverðlunin

 

Í reglum um Bókmenntaverðlaunin segir m.a.: 

Hver sá sem gefur út bækur á þess kost að tilnefna þær af útgáfubókum sínum sem hann óskar að komi til álita samkvæmt reglum um verðlaunin. Við tilnefningu skal tekið fram hvort um er að ræða;

  • Frumsamin íslensk skáldverk, laust mál eða ljóð, 
  • Önnur íslensk ritverk, fræðirit, frásagnir, handbækur og hver þau verk sem að jafnaði teljast ekki skáldverk eða fagurbókmenntir.  
  • Barna- og ungmennabækur

Framkvæmd verður sú sama og undanfarin ár, þ.e. tilnefndir verða 3 menn til dómnefndarstarfa í hverri nefnd. 
Verðlaunin eru kr. 1.000.000.- fyrir hvern flokk.   

Aug28

Skráning Bókatíðinda hafin

Höfundur Bryndís Loftsdóttir

Síðasti skráningadagur: 14. október 2015

Skráning Bókatíðinda hafin

Félag íslenskra bókaútgefenda annast útgáfu Bókatíðinda, sem dreift er á öll heimili á landinu um miðjan nóvember.  Hér á eftir fylgja nánari upplýsingar og leiðbeiningar um skráningu.

BREYTT BÓKATÍÐINDI 2015

Bókatíðindi 2015  verða óbreytt í uppsetningu frá í fyrra, brotinu verður þó breytt,  verður A4 (21,0x29,7 cm.), dálkar verða áfram tveir á síðu, dálkbreidd 9,25 cm. Á hverri síðu verða 12 bókakynningar. Ekki er gert ráð fyrir auglýsingum í Bókatíðindum 2015 nema á baksíðu.

Fast pláss verður fyrir hverja kynningu og þar með takmörkuð lengd á hverri kynningu, u.þ.b. 300 slög með bilum.  Bókaflokkar verða þeir sömu og á síðasta ári, en þá bættust við flokkar ungmennabóka, þýddra og íslenskra. Þessi bókaflokkur er vel þekktur erlendis frá undir nafninu young adult.

Útgáfuform verða áfram merkt með sérstökum táknum þannig að hver titill er aðeins kynntur einu sinni og þar tekin fram þau útgáfuform sem fáanleg eru, t.d. kilja, innbundin, hljóðbók, rafbók, með gormum, harðspjalda og svo framvegis. Í þeim tilfellum sem mismundandi útgefendur gefa út mismunandi form, t.d. prentaða og hljóðbók, förum við þess á leit að útgefendur skipti með sér kostnaði við birtingu. Sérstakir flokkar rafbóka og hljóðbóka falla því niður, en þær verða þó listar sérstaklega aftast í titlaskrá líkt og í fyrra.

May18

Styrkir vegna útgáfu myndríkra bóka um sögu Reykjavíkur

Höfundur Bryndís Loftsdóttir

Styrkir vegna útgáfu myndríkra bóka um sögu Reykjavíkur

Útgefendur myndríkra bóka sem tengdar eru sögu og menningu í Reykjavík geta sótt um styrk til niðurgreiðslu á kostnaði vegna kaupa á myndum til birtingar frá Ljósmyndasafni Reykjavíkur skv. gjaldskrá og magntilboðum safnsins. Styrkirnir eru vegna útgáfu bóka sem koma út á árinu 2015 eða í ársbyrjun 2016. Styrkirnir eru aðgerð í kjölfar menningarstefnu Reykjavíkurborgar sem miðar m.a. að því að hlúa að varðveislu menningararfleifðar og hvetja til miðlunar hennar. Þriggja manna dómnefnd skipuð tveimur starfsmönnum Borgarsögusafns Reykjavíkur og skrifstofustjóra menningarmála metur umsóknir.
Í umsókn komi fram nauðsynlegar upplýsingar um umsækjanda ásamt lýsingu á fyrirhugaðri útgáfu og verðáætlun Ljósmyndasafns Reykjavíkur vegna afgreiðslu ljósmynda í höfundarétti sem bera birtingagjald skv. gjaldskrá safnsins. Umsókn merkt ,,Myndrík bók um sögu Reykjavíkur“ berist á netfangið menning@reykjavik.is. Umsóknarfrestur hefur verið framlengdur til 12. júní.

May07

Stefnumót í Montreal

Höfundur Bryndís Loftsdóttir

Stefnumót í Montreal

Útgefendum gefst kostur á að sækja um þátttöku í Rendez-vous, stefnumóti útgefenda í Montreal, Kanada. Dagskráin fer fram 17.-22. nóvemeber, á sama tíma og bókamessan í Montreal. 10 erlendum útgefendum verður boðin þátttaka, greitt er fyrir gistingu og ferðakostnað. 

Nánari upplýsingar má finna á: UPPLÝSINGAR

Umsóknareyðublað má finna hér: UMSÓKNAREYÐUBLAÐ

 

May06

Ísland - heiðursgestur á bókamessunni í Abu Dhabi

Höfundur Bryndís Loftsdóttir

Ísland - heiðursgestur á bókamessunni í Abu Dhabi

Ísland verður að þessu sinni heiðursgestur bókamessunnar í Abu Dhabi sem haldin er um þessar mundir og tekur við keflinu frá Svíum sem voru heiðursgestir árið 2014. Á annan tug höfunda og útgefenda mun taka þátt í fjölmörgum dagskráratriðum og glæsileg sýningaraðstaða verður til kynningar á íslenskum bókum, landi og þjóð.

Abu Dhabi er eitt af hinum sjö Sameinuðu furstadæmum, en Abu Dhabi hefur markað sér þá sérstöðu síðustu ár að þar er mikill áhugi á menningu á meðan stjórnendur í Duabai hafa lagt áherslu á uppbyggingu fjármálamiðstöðvar. Í Abu Dhabi eru nú upp áform um að byggja útibú frá listasöfnunum Guggenheim og Louvre.

Sem merki um menningaráhuga Abu Dhabi, hefur þar verið stofnsett alþjóðleg bókamessa í samstarfi við bókamessuna í Frankfurt. Abu Dhabi bókamessan er haldin árlega og dregur að sér útgefendur frá öllum heimshornum. Þar sýna nú yfir 1000 útgefendur bækur frá 50 löndum.

Meðal sérkenna messunnar má nefna áherslu á myndskreytingar í bókum. Áslaug Jónsdóttir, einn höfunda bókanna um Stóra og Litla skrímslið ásamt fjölda annarra bóka og Lani Yamamoto, höfundur bókarinnar um Stínu stórusæng,  verða á meðal þeirra sem halda munu fyrirlestra á messunni og kynna verk sín.

Yrsa Sigurðardóttir og Ragnar Jónsson munu ræða um sakamálasögur og verðlaunahöfundurinn Jón Kalman Stefánsson mun fjalla um Himnaríkis- og helvítisþríleik sinn. Þá munu Gauti Kristmannsson, Þórir Jónsson Hraundal, Guðmundur Andri Thorsson og fleiri ræða um Íslendingasögurnar, verk Halldórs Laxness og samskipti Araba og Víkinga á miðöldum.

Apr27

Bóksala í Svíþjóð dróst saman á síðasta ári

Höfundur Bryndís Loftsdóttir

Bóksala í Svíþjóð dróst saman á síðasta ári

Bóksala í Svíþjóð dróst saman um 4% á síðasta ári. Sala skáldverka og fræðibóka minnkaði en barnabókasala jókst töluvert. Þess má geta að Svíar komu  illa út úr síðustu PISA lestrarkönnun líkt og við, og ollu niðurstöðurnar miklum viðbrögðum þar í landi.

Sala rafbóka er mjög lítil en eykst rólega. Útgáfa bóka á rafbókaformi var álíka mikil árið 2014 og árið þar á undan.

Niðurstöðurnar má lesa HÉR

Apr27

Alþjóðlegt námskeið tengt útgáfu

Höfundur Bryndís Loftsdóttir

Alþjóðlegt námskeið tengt útgáfu

Sumarskólinn í Oxford býður upp á tveggja vikna námskeið fyrir útgefendur og þá sem tengjast útgáfu með einhverjum hætti. Námskeiðið samanstendur af fyrirlestrum frá bæði reynsluboltum úr bransanum sem og starfsfólki Oxford International Centre for Publishing Studies, auk verkefna af ýmsu tagi.

Nánari upplýsingar um námskeiðið má finna með því að smella hér á hlekkinn:  OXFORD

Apr17

Vorbókatíðindi 2015

Höfundur Bryndís Loftsdóttir

Ríflega 140 nýjar íslenskar bækur komnar út það sem af er ári

Vorbókatíðindi 2015

 

 

Í tilefni viku bókarinnar hefur Félag íslenskra bókaútgefenda gefið út Vorbókatíðindi með kynningu á ríflega 100 nýjum íslenskum bókatitlum og er þó ekki allt upptalið.  Heildarfjöldi nýrra titla er líklega kominn yfir 140 titla sem  jafngildir því að ný bók hafi komið út hvern einasta dag ársins og gott betur.

Hér má finna rafræna útgáfu blaðsins:   VORBÓKATÍÐINDI 2015

 

 

Apr10

Bókamessan í London

Höfundur Bryndís Loftsdóttir

Miðstöð íslenskra bókmennta tekur þátt í bókamessunni í London dagana 14.-16. apríl og kynnir íslenskar bókmenntir.

Bókamessan í London

Nýr bókalisti kynntur í London

Í kynningarstarfi Miðstöðvar íslenskra bókmennta (Míb) í London verður lögð áhersla á lista yfir bækur frá liðnu ári, en Miðstöðin hefur gert sambærilega lista undanfarin tvö ár, líkt og tíðkast hjá systurstofnunum Míb erlendis. Á kynningarlistanum má finna nýjar bækur, verðlaunabækur síðasta árs, bækur eftir unga, upprennandi höfunda og bækur sem nýlega hafa verið seldar erlendum útgefendum. 

Jan30

Íslensku bókmenntaverðlaunin afhent á Bessastöðum í dag

Höfundur Bryndís Loftsdóttir

Íslensku bókmenntaverðlaunin afhent á Bessastöðum í dag

Forseti Íslands, herra Ólafur Ragnar Grímsson, afhenti í dag, föstudaginn 30. janúar 2015, Íslensku bókmenntaverðlaunin 2014, við hátíðlega athöfn á Bessastöðum.

Verðlaunin skiptast í þrjá flokka og þeir sem að þessu sinni hlutu verðlaunin voru:

Barna- og ungmennabækur:

Bryndís Björgvinsdóttir: Hafnfirðingabrandarinn - útgefandi: Vaka Helgafell

Fagurbókmenntir:

Ófeigur Sigurðsson: Öræfi - útgefandi: Mál og menning

Fræðirit og bækur almenns efnis:

Snorri Baldursson: Lífríki Íslands - útgefandi: Forlagið og Bókaútgáfan Opna

<<  1 2 [34 5 6  >>